Vi bezonas konton ĉe unu el la sekvaj retprovizantoj por uzi tiun salutmetodon: Google, Facebook. Principe ni povus subteni pliajn, kiuj permesas senpage registri la aplikaĵon Revo-Redaktilo. Se vi bezonas, bv. peti ĉe la administrantoj de Reta Vortaro aŭ kreu peton per la butono [ New Issue ] ĉe voko-cetonio.
Esperantajn signojn vi povas tajpi en ĉiuj kampoj, kie ili povas aperi, per la x-klavo: "cx" fariĝas "ĉ" kaj "cxx" respektive "ĉx" fariĝas "cx" ktp. Redaktante la XML-tekston, atentu, ke ene de markoj oni ne rajtas uzi ne-askiajn signojn.
La tradukdialogo montras nur tradukojn de derivaĵoj, sencoj ktp. kiuj havas markon. Ĝi ne montras tradukojn de senmarkaj sencoj aŭ de rimarkoj. Mi konsilas aldoni markojn al la sencoj ĉiam, eĉ se estas nur unu.
La diversaj kroziloj havas diversajn manierojn kiel funkcias JavoSkripto, kiun la redaktilo uzas por siaj multaj komfortaj funkcioj. Bedaŭrinde estas ne eble por mi testi ĉiujn kombinojn de kroziloj kaj operaciumoj. Do eble ne ĉiuj cimoj troviĝas antaŭ apero de nova eldono. Se vi trovas problemon, bv. laŭeble averti min (ĉe la projekto-paĝo, vd. supre). Dankon! Jen kelkaj spertoj, kiuj povas helpi.
Laŭ mia subjektiva eksperimentado Chrome kaj Chromium funkcias plej glate kaj rapide kun la redaktilo. Mi mem uzas Chromium sub Ubunto-Linukso. Mi trovis unu problemon sed ne jam solvon, se mi uzas Chrome sub Vindozo kune kun esperanta tajpilo Ek!: Foje la konfirmo-klavo (liniŝanĝo-klavo) ne funkcias. Helpas malŝalti Ek!, premi la klavon por komenci novan linion kaj reŝalti Ek! poste. De versio 0.9 aldoniĝis subteno por la x-klavo per kiu vi povas enigi esperantajn supersignajn literojn. Tiel vi povas pli facile malŝalti Ek! dum la tuta redaktado.
Ni ne plu subtenas.
Fajrovulpo ekde la versio 57, kiu anstataŭis la kernon per nova, nomita Kvantumo, ne plu havas la antaŭan rapideco-problemon redaktante ampleksajn artikolojn.
Mi iom uzis kaj ĝenerale ŝajnas funkcii, sed mi ne povas provi ofte por esti certa.